Welcome

01-08-2010, 01:06 PM

النكتةوالطرفة الفلاّحية ــ 2
طرائف من حياة وذاكرة القرية
جمع وإعداد : الداعي بالخير: صالح صلاح شبانة
[فقط الأعضاء المسجلين يمكنهم رؤية الروابط. ]

انبطحي يَمّ العبد :ـ
أبو العبد وأم العبد في السبعين من عمرهم طالعين بالخلا مع الطالعين ، وكل ما مرقت طياره معاديه يوخذوا الأرض على وجوههم !!
مرقت الطيارة توِّز وز ، أبو العبد خاف على أم العبد ، صرّخ عليها : إنبطحي يَمّ العبد انبطحي ...!! أم العبد زعلت وقالت : عزا في دار اليهود .. هو وقته يا بو العبد ؟؟ ... وانتوا عاد شوفوا قديش تفكير أم العبد رغم الموت والقتل والخوف ، أخذت على هذاك الإتجاه ...!!!
أيام مليانه أحداث ، ومليانه خراريف ، بتروح أدراج الريح ما حدا بوخذ باله منها ، بقولك أيش ؟؟ هذا غسيل وسخ ، ما بدنا ننشره ... ولمّا ننشره بنلاقيه حضاره ضاربه شروشها جوّه الصخر .. وهي اللي بتشكل الهويه الثقافية والحاضريه إلنا ...!!!
اللي جَبّر الفقوسه :ـ
وهذي الصوره بتعبّر عن الذكاء ، بقى بياع فقوس ، وبقى عنده فقوسه مكسورة ، واجا واحد بده يشتري فقوس ، ، طيب وإذا الوزن نِقِص والزبون ما بده الفقوسه المكسوره ، والبيّاع بده إيّنَفِّق كل بضاعته .. شو يساوي؟؟؟ تخرب البيعه يعني ؟؟ لأ مش معقول .. ، راح جاب عود وجَبّر الفقوسه .. حشاه بلا قافه بين نصين الفقوسه ورجّعها لشكلها الأصلي وصارت الفقوسه بسم الله عليها وحواليها ، صحيحه ومش مكسوره ، ولمّا يجيي اللي بده يوكلها يوكلها ، يروح يدق راسه في الحيط ...!!
حمار أبو محمود :ـ
مره إجا جار سيدي أبو محمود ، بده يستعير منه لِحمار ، وابو محمود رغم إنه كريم ، وابن حلال وموهوب للعطاء، بس هذاك الجار بقى عنده قاعدة (سيكارة بدوي من علبة فلاّح) ، يظلم لِحمار ويهد حيله ، ويحاول يقضي شغل الموسم في أكم من ساعه ، هي هذيك المده اللي ببقى مستعير فيها لِحمار ، وما يتكرّم عَ لِحمار بحفنة شعير ، يعني يشتغل عليه بمونته ، ولمّا يرجّعه ببقى خاير من الجوع ، يوكل وجبه مدوبله ، وبقى صعب على ابو محمود يقول للجار ، أنا ما بدي أعطيك لِحمار ، لإنك كذا وكذا ، وبده يشوف له طريقه يخلص منه ويرحم لِحمار من ظلمه ، مع انهم كل أهل البلد بحكوا ، وبقولوا ولِمّخبّى بندوق ...!!!
ورسم أبو محمود الخطه ، ومجرد ما إجا الجار يطلب لِحمار ، وقال له : يا جارنا أبو محمود بدنا تشحدنا ها لحمار وقدرك أكبر ، قال له : حاضر يا جار ، تأمر أمر ، نط عَ قاع البيت ، وحل لِحمار وقاده لعند الجار برّه الدار ، ومَسّكَه الرسن وقال له ، إركب عليه ، خجل الزلمه وقال : لَهْ يا جار ، ومعقول هالحكي ؟؟ قال أبو محمود : ما هو هلقيت بس تقزي عني بدك تركب عليه ، بس عليّ الطلاق من نسواني الثنتين إذا ما ركبت عَ لِحمار ما أعطيتك إياه ، الزلمه ادّعى الخجل والتواضع ، ونط نطة معلم متعود ، والا وهو في ظهر لِحمار ، قال له أبو محمود : قول للحمار حِي يلعن أبو صاحبك ، قال الزلمه وهو يدّعي الخجل والتواضع : لَهْ يا أبو محمود ، سلامة قيمتك وقيمة أبوك ، هو فوق المعروف ضرب كفوف ؟؟ ، قال له : دشرنا من الحكي ، لأنه علي الطلاق من نسواني الثنتين إذا ما بتقول للحمار : حِي يلعن أبو صاحبك ما بعطيك اياه ، لأنك بس تقزي عني بدك تسنسل لكل حمولة صاحب لِحمار، فالزلمه بعد ما مانع شويه قال للحمار : حِي يلعن أبو صاحبك ...!!!
هون أبو محمود تهلل وجهه وقال : إذا بده يعطيك إياه ..! ودغري سحب الرسن منه وزقه عن ظهره ، وقال له : فك كيسك وروح اشتريلك حمار ، ودشر حمير الناس للناس ، وعلى رأي خالتك أم كلثوم: إنما للصبر حدود، وانت ما خليت لحدا حدود..!
ورَجّع لِحمار عَ المذود يمزمز تبن وشعير ، وخلصه من ظلم وبخل هذاك الجار النتن...!!!
صلاة العشاء :ـ
بقوا الناس يا جماعة الخير روحهم خفيفه ومليانه حيويه ، أكلهم ومعاشهم من ها لأرض ، ووجبتهم الرئيسيه العدس والزيت والبصل ، والخبز المفتوت بمرقة العدس في باطية العجين ، واحد من اعمامنا الحراثين روّح من لِحراث خاوي من الجوع ، لاقته بنت عمه بباطية فت العدس لخناقها ، وعرام رصيع وراس بصل فحل ، دقه بكفه اللي مثل الحجر ، نط الزنبوط وضرب بالحيط ، وقال بسم الله ، وظل يوكل لمّا وقف أباطه وطلع الطبيخ من مناخيره ، وبعدها راح عَ الجامع يصلي لِعّشا ، وبقى الإمام ختيار ، صوته ممطوط ، وباله طويل ، فقعت مرارته من سنة ما اتجوز ، وصار دمه أبرد من دم الإنجليز ، ويصر إنه في كل ركعه وسجده غير يسبح عشر تسبيحات ، وفي الركعه الأولى ما قال الإمام سبحان ربي العظيم خمس مرات غير حس حاله انخنق ، دغري قطع الصلاه وقال للإمام : الله يقطع قلبك مثل ما قطعت قلوبنا ....!!!
ونفس الإمام راح مره على قريه ثانيه ، وبقى فيها جامع مبني جديد بالباطون ، مش مثل جامع بلدهم اللي بقى كنيسه صليبيه من أيام الحملات الصليبيه ، واحترام لزيارته الكريمه قدموه يصلي فيهم إمام ، ولما قرا الفاتحه وقالو وراه : آآآآآآآميييييييييين ، صوتهم أعطى صدى أعجب الشيخ ، فدار عليهم ظهره وقال بإعجاب : أما صوت ..!!!

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

Welcome

النكتةوالطرفة الفلاّحية ــ 2

قسم التراثيات الفلسطينية

للمزيد من مواضيعي

اسم العضو		حفظ البيانات؟
كلمة المرور

الذين يشاهدون محتوى الموضوع الآن : 1 ( الأعضاء 0 والزوار 1)